Dadaalo lagu koryeelayo tayada Quraanka Kariimka ah ee Madarasada Imaamu Shaadibi ee Magaalada Borama ayaa la wadaa.

Boorama-(Lug)-Dadaalada ayaa waxa hormood ka ah Marwo Raxma Xaashi Cabdi oo ka mid ah Jaaliyada Somalida ee Dalka Ingiriiska oo dhawaan soo degtay magaalada Borama.

Marwada ayaa waxa ay maanta ku wareejisay Maamulaha Madarasada Imaamu Shaadibi Sh.Xuseen Sh.Nuur lacag dhan 6500$ oo uu odaygeega Cali Maxamed Jaamac hormuud ka ahaa sidii looga soo uruuriyay dadka jecel inay kor yeelaan quraanka kariimka ah eek u nool dalka Ingiriiska.

Munaasibadaasna waxaa goob joog ka ahaa Maamulaha Shirkada Telesom ee G/Awdal C/qaadir Aadam Nuur.

Sh Xuseen oo ka hadlaya Munasibadaasi ayaa tilmaamay Ahmiyada ay leedahay in Quraanka kariimka ah loo huro maal iyo nafba sidii loo daryeeli lahaa loogana dhigi lahaa mid ka sareeya Culuumta la barto oo dhan  waxaana uu tusaale u soo qaatay Madarasadaha Quraanka Kariimka ah lagu barto oo dhan ee Magaalada Hargeysa oo ay dadka reer Hargeysaad u dhiseen Guryo ka sareeya dugsiyada Caadiga ah lagama howl galiyay macalimiin tayo leh mar uu bar bar dhigayay Madarasadaha Quraamka ee magaalada Borama ayaa waxa uu ku tilmaamay inay wali dayacan yihiin isla markaana ay madarasadahaasi dhigtaan Arday aad u tiro badan.

     Sheekh Xuseen Oo Lacagtii kala wareegaya Marwo Raxma

Mar uu ka waramayay Deeqdan maanta la gudoonsiiyay waxa ay ku qabanayaan iyo halka ay ka timiday ayaa waxa uu yidhi Qoyskan oo markii hore reer London ahaa maantana soo degay Borama oo awlaadooda habeen iyo maalin iyo quutal daruuri uga dhigay Barashada Quraanka kariimka ah ayaa awlaadooda ku soo daray Madarasada ka dib markii ay Marwo Raxma aragtay Xaalada Madarasada ayaanu ka kulanay sidii wax loogu qaban lahaa waxaana usoo ban dhigay inay madarasadu haysato dhul Cabirkiisu dhan yahay 27M dherer iyo 15m Balac oo ay arday Madarasada Wax ka baratay u iibiyeen waxaanan isla garanay in dhisme balaadhan halkan laga sameeyo maantana waxa aan ka gudoonay 6500$ oo uu hormood ka ahaa Soo ururinteeda Odaygeeda Cali Maxamed Jaamac Alaha ka raali noqdee , waxa aan doonaynaa in si aan loo guurguurin uu dhismahani rasmi u noqdo Madarasada seeskana lagu bilaabo Dabaq waxaanan rajaynayaa in laga wada qayb qaadan doono.

  Maamule C/qaadir Aadam,Sheekh Xuseen iyo Marwo Raxma Xaashi

Sidoo kale Marwo Raxma Xaashi oo iyana ka hadashay ayaa si wayn ugu mahad naqday dhalinyaradii qaadhaanka soo uruurisay oo uu ugu horeeyo odaygeega Cali Maxamed Jaamac waxaa kale oo ay tilmaantay in looga baahan yahay qofkasta oo muslim ah inuu ka qayb qaato arimaha diinta loogu gargaarayo gaar ahaan dadka reer Awdal inay wali ka gaabinayaan arinta waxana ay tidhi”Dhalinyarada soo uruurisay Qaadhaankan ee 6500$ ah waxay iskugu jiraaan dalal faro badan oo muslimka ku abtirsada marka reer Awdal loo yimaado 190$ oo qudha ayay ku biirsadeen waxaana loo baahan yahay inay dar dar galiyaan ayaa loo baahan yahay mar ay ka waramaysay Talaabooyinkan ay iyada iyo odaygeedu qaadeen ayaa waxa ay tidhi “ markii aan aragnay Dayaca haysta Madarasadan Imaam Shaadibi oo ay ardayda dhigataa badan tahay Macalimiinta ay haystaana ay aad u wanaagsan yihiin ayaanu go’aansanay inaanu wax ka qabano sidaanu aakhiro xasanaad ugu helno, waxaanan soo ban dhigi doonaa in badan intan hadii ala yidhaahdo.

Sheekh Xuseen Oo Shahado Sharaf Gudoonsiinaya Marwo Raxma

Maamulaha Shirkada Telesom C/qaadir Aadam Nuur oo isaguna laf dhabar u ah howlahan ayaa waxa uu tilmaamay inuu aqoon dheeraad ah u leeyahay Md.Cali Maxamed Jaamac oo isagu ah ninkii Hormoodka ka ahaa ololahan Qaadhaanka ah waxaana uu yidhi”Cali iyo Qoyskiisa xidhiidh ayaan lahayn tan iyo intii ay soo degeen Borama calina waa nin reer Gado ah waxaase uu caruurtiisa u soo dajiyay Borama ka dib markii uu arkay inay reer borama yihiin dad furfuran soo dhawayn leh lanala noolaan karo, Madarasado badan oo indha indheeyey ka dibna waxa uu go;aansaday in Madarasada Imaamu Shaadibi inuu caruurtiisa geeyo waxaana uu gacanta kaga riday Caruurtiisa Sheekh Xuseen oo la ogyahay inuu yahay Aabaha Quraanka ee reer Awdal”.

Sidoo kale waxa uu C/qaadir isna canaan kulul usoo jeediyay dadka reer Awdal oo uu yidhi “waxaa loo baahan yahay inaad dar dar galisaan oo kordhisaan howlaha qaadhaanka ah ee kor loogu qaadayo tayada quraanka kariimka ah isla markaana aad ku dayataan dadka aan reer Awdal ahayn ee hadana jecel inay gobolkeena wax ka qabtaan  ee ay ka mid ka yihin Cali.

Sheekh Xuseen ayaa ka dib markii uu ka gudoomiya qadarkaasi lacagta ah waxa uu gudoonsiiyay Raxma Xaashi Cabdi Shahaado Sharaf ay madarasadu ku maamuustay doorka ay ka qaateen sidii quraanka Eebe looga dhigi lahaa mid wax walba ka sareeye.

 

 

 Wariye:-
Cabdalle Cali Yuusuf
Lughaya News-Borama