”15ka May Wixii Ka Dambeeya Rayaale Waxan U Aqoonsan Doonaa Guddoomiyaha  Xisbiga UDUB” Wakiilka Kmg Ee Xisbiga Kulmiye Ee  G/Awdal.
Borama-(Lug)-C/laahi Ismaaciil Oogle,(ina xiirane),kana mid ahaa Guddiga Fulinta Ee Xisbiga Kulmiye Ee G/Awdal,haatan sheegtay inuu yahay wakiilka kumeel gaadhka ah ee xisbigaasi ee G/Awdal ayaa sheegay in  wixii ka dambeeya  15 May uu xisbigiisa iyo taageerayaashiisuba Daahir Rayaale u aqoonsan doonaan guddoomiyaha xisbiga UDUB ee Soomaaliland ,una aqoonsan doonin madaxweynaha Soomaaliland.

Shir Jaraa’id oo uu Cabdilaahi Ismaaciil Oogle ku qabtay Boorama  maanta ayaa waxa kale oo uu kaga warramay  arrimo ay ka mid yihiin  eedeymaha xukuumaddu   xisbiga kulmiye ugu soo jeedisay qaraxyadii ka dhacay Hargeysa ,arrimaha muddo kordhinta Guurtidu ku kacday ,sida sida gaarka ah ee  maamulka G/Awdal u beegsado taageerayaasha amaba masuuliyiinta Xisbigaasi ee Gobolka , waxa ka jira dib udhac la sheegay inuu ku yimid  qaybtii labaad ee ka hadhay shirweynihii xisbiga Kulmiye iyo kala saarista  musharraxiinta reer Awdal ee mansabka madaxweyne kuxigeenka haddiiba ay doorashooyin dalka ka dhacaan ,isagoo arrimahaasi ka hadlayana waxa uu yidhi:-

“Wakhti xun ayey Soomaaliland maraysaa waxana  ilaahay uga baryayaa inuu  inaga dulqaado .Intaa kaddib  Anigoo ku hadlaya magaca Guddoomiyaha kumeelgaadhka ah ee Xisbiga Kulmiye ee G/Awdal ,maadaama Wakiilkii iyo Maamulkii hore ee  Xisbiga ee gobolku meesha ka baxeen markii uu bilowday shirweynihii xisbiga Kulmiye ee Hargeysa ka dhacay, waxaan Aniga iyo taageerayaasha Xisbiga ee gobolkuba raacsan nahay  go’aankii labada Xisbi ee mucaaradku kasoo saareen muddo kordhinta Guurtidu  Daahir Rayaale sannadka ugu dareeni tahay mid xaaraan ah oo ka baxsan sharciga ,isla markaana marka uu dhammaado wakhtiii sharciga dalku u banneeyey inuu xilka hayo oo ku eg 15may wixii  ka dambeeya an Daahir Rayaale u aqoonsan doonno  Guddoomiyaha Xisbiga Dawladda ee UDUB.

Arimaha ku saabbsan qaraxyadii Hargeysa ka dhacay  dhawaanta ee lagu eedeeyey Xisbiga Kulmiye ,waxan leehay xukuumaddii Siyaad Barre intay laba beelood ama laba reer dab kala dhex dhigto ayey haddana mid kasta kan kale farta ugu fiiqi jirtay si  ay isku dilaan ,arrintaasi iyadaa  og ,oo nabadgelyada xil ka saran yahay,Golaha guurtiduna waxay ku  dhaqaaqeen inay dalkan khatar geliyaan markii ay u kordhiyeen Rayaale.,wixii arrintaa aan ka yeelaynana hoggaanka xisbiga ayey u taallaa.

Anigoo ka hadlaya musharraxiinta reer Awdal  iyo arrinta Boorama laga hadal hayo ee lagu sheegeyo in shirweynihii  xisbiga ee loo ballansanaa 29ka bisha uu dib u dhacayna aanay waxba ka jirin ,shirkaasina socon doono.Dhinaca Musharraxiinta Reer Awdal ,ee afarta ah ,kalana ah C/raxmaan Saylici, Ismaaciil Muumin Aare ,Dr.Cabdilaahi Xaashi Abiib iyo C/raxmaan Aw Cali ,waxana leehay arrintaasi si miyir qabta oo raalli loo kala yahay ayaa loo dhammayn doonaa .

Arrinta kale ee  Gobolkan u gaar ahina waxay tahay sidii xal loogu heli in xisbiyadu madaxbanaanaadaan ,Guddiga Nabadgelyada ee gobolkan xukumaana  shicibka u oggolaadaan inay  xaqooda ka hadlaan ,taageerada xisbiga Kulmiyana aan laga dhigin mid dembi ah “

Wariye:-
Maxamed Cumar Sh.(Hyane)
Lughaya News-Borama.