Boorama-(Lug)-Gobolka Awdal  ayaa  la ogaaday inay ka shaqeeyaan  ugu badnaan shan hay’adood oo ka mid ah  hay’adaha dawladda, iyadoo  dhinaca kalena    badi xafiisyadii   dawladda  ee shaqayn lahaa dad shicib ahi  isku haystaan .

Sida muuqata waxa gobolka Awdal ka shaqeeya wasaaradaha  Maaliyadda , Caafimaadka, Waxbarashada, Caddaladda iyo arrimaha gudaha gudaha kuwaasoo adeegyadii Xukuumaddu ugu talogashay meel itaal dhigaba la arko inay subaxdii  kusoo kallahaan dad shaqaale ah, hase  yeeshee aad mooddo inay xidhan yihiin xafiisyadii hay’adaha dawladda   oo gaadhaya ilaa dhawr iyo toban, wasaaradaha qaarkoodna  aanayba lahayn wax shaqaale ah oo ka hawlgala, marka laga reebo  isuduwaha  oo inta badana hawshiisu ku xidhan tahay xafiisyada dhexe ee caasimadda , taasina ay keento in shaqada uu hayaayi kala badh ku dhammaato safarro  .

Qaar ka mid ah waasaradaha dawladda ee gobolka ayaa xafiisyadoodii dad shicib ah isku haystaan sidii ay u qaadan lahaayeen inta ka hadhay dhismayaashii dawladdii Siyaad Barre  ka tegtay, dhismayaashaasi ama xarumahaasoo murankoodu noqday mid saameeyey hawlaha golaha degaanka Boorama, isla markaana golahaasi itaal u la’ayahay sidii uu dadkaasi shicibka ah uga xoreyn lahaa xafiisyadaasi   oo ay ugu horreeyaan kuwa ay leeyihiin ama lahaan jireen wasaaradaha xoolaha iyo beeraha.

Guud ahaan xafiisyada dawladda ee aan ka shaqayn gobolka Awdal ayaa ahaa kuwa   xukuumadihii iskaga dambeeyey Somaliland aanay waxba ka dhaqaajin , aakhirataankiina kusoo beegmay wakhti xukuumadda Axmed Siilaanyo la filayey ama la filayo inay wax badan ka qabato hawlaha maamul daadejinta  ee inta badan la sheego inay horumar u keenaan maamulada dawladaha Hoose, isla markaana wax laga qabto sidii xafiisyo loogu samayn lahaa dhammaan wasaaradaha aan xafiisyada ku lahayn gobolka, arrimahaasoo ay in badan ka hadli jireen masuulyiintii soo martay  wasaaradahaasi  ee ku magacawnaa gobolkan, masuulyiinta ama isuduwayaasha qaar ayaa xafiisyo aan lahayn, halka kuwa kalena ay shaqayn jireen muddo dheer  balse aanay waxba kusoo kordhin dalwadihii iskaga dambeeyey dalku, sidaa darteedna aad mooddo in dalkuba yahay oo keliya caasimadda Hargeysa, goboladuna noqdeen kuwa  anay cidiba ka warhayn.

Wariye:-
Maxamed Cumar Sh.Ibraahim-(Hyena)
Lughayanews-Boorama