Boorama-(Lug)-Maxkamadaha  magaalada Boorama  ayaa mar kale waxa hadheeyey muran ka  dhashay caruur   ay  sheeganayaan waalidiinta qoys ama qoysas, mid kastaana   doonayo in loo soo wareejiyo carruurtaasi .

Saddexdii bilood ee dambaysay  ayaa  sida la sheegay  dhawr qof oo isugu jira waalidiin aabbo iyo hooyooyinba lihi Maxkamadda degmada iyo tan gobolkaba lagu arkayey iyagoo maxkamadaha ka  codsanaya in la kala saaro qoysaskaasi, caruurtaasina  u raaci lahayd mid ka mid ah waalidiintaasi, hase yeeshee ilaa imika murankaasi loo maaro laa’yahay aakhirataana laba maalmood ka hor  maxkamadahaasi kiiskaasi ama murankaasi iskaga wareejiyeen  guddi culimaa’uddiin ah oo la filayo inay go’aan kama dambays ah ka gaadhaan ,

Sannadkii hore ayaa la ogaa muran caynkan oo kala ah  oo ay iskaga hor iman gaadheen laba beelood oo reer Boorama kaddib markii ay ku murmeen qoys ka koobnaa    sagaal wiil iyo aabahood , aakhirataankiina  loo saaray guddi culimaa’uddiin ah  oo soo afjaray murankaasi, qoyskaasina uu raacay beel ka mid ah beelaha reer Boorama .

Waxa iyaguna jira kiisas ama tuhunno noocan oo kala ah oo aan weli shaac laga qaadin, lana hor keenin maxkamadaha iyo culimaa’uddiinka, kaasoo  sida la sheegeyo u dhexeeya laba qoys oo mid kastaaba sheeganayo   wiil  dhawr iyo toban jir ah .

Muranada noocan oo kala ah  ayaan hore looga aqoonin gobolka Awdal balse aad moodayso inuu dhawaanahan kusoo badanayo bulshada dhexdeeda, iyadoo inta badan la ogaa uun dhisme ama jagooyin lagu muransan yahay  oo la iskaga hor yimaaddo.

Wariye:-
Maxamed Cumar Sh.Ibraahim-(Hyena)
Lughayanews-Boorama