Faallo-(Lug)-Waxa  indhawaaleba isasoo  taraya habdhaqanka masuuliyiinta dawladda cusub qaarkood u adeegsanayaan gaadiidka dawladda ee loo siiyey inay ugu adeegaan danta guud iyo tan qarankaba, balse dhinaca kale la sheegeyo in masuuliyiintaasi gaadiidka dawladda iyo shidaalkoodaba u isticmaalaan dano gaar ah , isla markaana gaadiidkaasi u adeegsaada sidii waxa iyagu leeyihiin .

Marka laga reebo masuuliyiinta xukuuadda sare iyo xubnaha golaha wasiiradaba oo iyaga dhaqdhaqaaqooda dhinaca goboladu iskaba yaryahay, haddii ay tegaanna ugu baqoola arrimo xasaasi  ah iyo kuwa siyaasadeedba, hase yeeshee waxay arrintani inta badan laga arkay masuuliyiinta hoose  ee laamaha dawladda iyo hay’adaha   madaxa bannaan ee dawladda kuwaasoo inta badana masuuliyiintoodu gaadiidkaasi u adeegsada  waxyaalo ka baxsan shaqada qaraanka, isla markaana gaadiidkaasi iyo shidaalka dawladdu u qortayba  ugu shaqeeya dano shakhsi ah .

Masuulyiinta la sheegeyo  Inay gaadiikaasi si ka baxsan  shaqada loo siiyey u isticmaalnaan  ayaa badi  ka mid ah masuulyiinta xukuumadda Axmed Siilaanyo u magacawday  xilalka agaasimayaasha ama kuxigeenada  kuwaasoo inta badan kasoo jeeda gobolada galbeedka iyo barigaba  welina aan si rasmi ah usoo degin caasimadda Hargeysa, Waxa la sheegeyaa in khamiis kasta ama arbaca kasta aay caasimadda ka baxaan kontomeeyo gaadiidka dawladda ah, isla markaana wata lambarka  GT-ga, kuwaasoo maalmaha jimcaha iyo maalamaha ku xigaba  dib ugu laabta qoysaskoodii ama qaraabadoodii  oo weli ku sugan degaanadii ay ka yimaaddeenn, caasimaddana aan soo degin .

Sida wararku sheegeyaan gaadiidkaasi oo isugu jira  kuwa landcruiserda  ama serfyada ayaa qaarkood labadaa maalmood gooyaan boqolaal kiiloomitir  oo safar ah, kaddibna kusoo laabta Hargeysa iyagoon la ogeyn meesha lala tegey iyo hawsha lagusoo qabtay . Isticmaalka gaadiidka dawladda loo adeegado wax ka baxsan shaada qaranka ayaa dawladdii hore ee UDUB  wax badan ka qabatay maalmihii ama bilihii ay sii dhacaysay , isla markaana gaadiidkaasi u samaysay saacado gaar ah iyo fasax gaar ah oo uu ku shaqayn karo inta kalena la dhigo xafiisyada dawladda .

Masuuliyiinta xukuumadda Axmed Siilaanyo oo laga yaabo qaarkood inay xiiso badan u qabeen gaadiidkan cadcad ee laga safay ayaa laga yaabaa in qaranka geliyaan kharash badan oo dib loogu hagaajiyo ama dib loogusoo iibiyo maadaama  isticmaalkooda wax ka baxsan shaqada qaranku keeni karto inay soo gaabiyaan cimriga gaadiidkaasi  laga soo iibiyey cashuurta muwaadinka .

Sida ay sheegeyaan wararkaasi  qaarkoodna laba xaqiijiyeyba  in   gaadiid loo isticmaalo soo dhaweynta   ama sagootinta qaraabadooda   masuulyiintaasi ee daafaha dalka ,  aroosyada , siyaarooyinka iyadoo ay dhici karto in gaadiidkaasi loo adeegsan karo arrimo ka baxsan amniga haddii aanay  hay’adaha ku shaqada lihi siinin  fasaxa safarada  shaqo sidaa darteedna waa xukuumadda cusub la gudboon inay gaadiidkaasi ku fara adaygto loona adeegsan  arrimo ka baxsan shaqada hayadaha ay hoos yimaaddaan.

Wariye:-
Maxamed Cumar Sh.Ibraahim-(Hyena)
Lughayanews-Boorama