Boorama-(Lug)-Xubno isugu jira cuqaal salaadiin kasoo jeeda beelaha Awdal iyo Selel ayaa  qurba joogga reer Awdal ee u ololaynaya waxa loogu awdal state  ku tilmaamay kuwa an metelin  dadka ay sheeganayaan ,
 isla markaana  doonaya inay xasilooni darro ka abuuraan Somaliland.

Salaadiintan oo kasoo kala jeeda beelaha Ciise iyo Samarroon  oo maanta shir jaraa’id ku qabtay Boorama  kaga hadlay  arrimahaasi .

Suldaan Muuse Cilmi Dugsiiye oo ugu horreyn halkaasi ka hadlay ayaa sheegay in dadka sheeganaya  inay kasoo jeedaan gobolka Awda , aanay ahayn kuwa meteli karaya bulshoweynta  gobolkaasi isla  markaana arrimaha ka dhanka qarannimada Somaliland  aanay marnaba ku guuleysan doonin .

Suldaanka  oo arrimahaasi ka hadlayaana waxa uu yidhi “waan ognahay cidda arrimahan ka wadwadda debedaha , mana aha kuwa  waxyeelayan karaya ama wax ka beddeli karaya go’aankii reer Awdal iyo Selel iyo Somaliland ku  wada dhisteen qarannimada dalka, sidaan darteedna wax saamayn ah oo caynkaas kama samayn karaan dalka, waana kuwa naftooda la cararay oo qaxooti ah  “.

Axmed Cali Bile kana mid ah siyaasiyiinta beesha Ciise oo isna halkaasi ka hadlay ayaa yidhi “runtii maaha wax lagu daalo inammo yar yar ama siyaasi meelahaa ka had hadla  oo ku sheekeeya wax aan dalkan  iyo dadkan midna  aaminsanayn , waxna  iskama beddelin mawqifkii reer Awdal iyo reer Selelba ku taageerayeen  gooni isutaagga Somaliland, waxan leehay waar shalay dalkan reer Awdaloow idinkaa xukumayey maantana  walaalihiin uunbaa xukuma ee kudedaala taageeradiina dhinaca horumarinta, kana baxa wax kastoo isku diraya shacbiga  dalka, waxaan u dhimaya qarannimadiisa  iyo amnigiisaba .

Sh.Xasan  Colhaye kana mid culimada diinta ee Boorama oo isna halkaasi ayaa yidhi “belaayadu way hurudaa  lamana toosiyo, haddaba waxan dadkyaga debedaha jooga u sheegeya inaysan iska xumayn wejiga iyo sumcadda reer  Awdal ku leeyihiin debedda iyo gudahaba sababtoo Boorama lagu dhisay Somaliland , lamana dumin karo  dawladnimada, waana ceeb in maanta oo aan  ka mid nahay inta xukunta dalka la isku mashquuliyo ama dadka  lagu jahwareeriyo wax aan soconayn, reer Awdal iyo Selelna aanay yeeli karayn .”

Wariye:-
Maxamed Cumar Sh.Ibraahim-(Hyena)
Lughayanews-Boorama