Boorama-(Lug)-Wasaaradda Diinta Iyo Awqaafta  ayaa sideedaba waxay u xilsaaran tahay inay kala hagto diinta iyo siyaasadda dalka  kasta iyo dawlad kastaa ku socdaan .

Dastuurka Somaliland oo asal ahaan ku salaysan diinta islaamka ayaan sideedaba cidi ku muransanayn  in dalkani yahay  100% muslim  sunni ah. Sidaasoo kale ayaa wasaaradda awqaafta xil uga saaran yahay inay qabato cid kastoo fasiraado khaldan ka bixisa diinta, isla markaana ugusoo gabbata arrimo siyaasadeed iyo kicin dadweyne .

Waxa Boorama bilihii u dambeeyeybna  circa isku shareeray  wacdiga diini ah ee xambaarsan  fasiraado kala duwan, muxaadarooyin had iyo jeer logu yeedho dumarka iyo carruurta, balse aanay badi wasaaradaasi la socon ajendayaasha muxaadarooyinkaasi  oo marmarka qaarkood lagu qabto masaajidyada, xaafadaha iyo meelo kaleba, lagana yaabo in nuxurka muxaadarooyinkaasi huwan yihiin wax aan dan u ahayn dalkan iyo dadkan .

Waxa iyaguna kuwaa barbar socda wacdi diini oo aan xad lahayn oo ay inta badan Boorama ka wadaan guddiga wanaagfarista iyo xumaanreebista, kuwaasoo habeen iyo maalinba codbaahiyayaal kula wareega suuqyada iyo farasmagaalahaba, Inkastoo ay  xubnaha guddigaasi wakiilka uga ah gobolka Awdal ka hadlaan badi shay iska caadi ah oo dadka ku hanuuninaya wanaagga, hase yeeshee waxaya inta badan ku talaxtegaan arrimaha Xasaasiga  ee khuseeya dalal badan oo aynaan aqoonba u lahayn .

Waxa kale oo iyaguna isasoo taray  khudbadaha masaajidyada ay jimcayaashiai ka akhriyaan  qaar ka mid ah culimada diinta ee Boorama, khudbadahaasoo qaarkood lagu durayo xukuumadda haatan iyo  siyaasaddeeda.

Khudbadahan  laga jeedinayo masaajidyada Boorama  marmarka qaarkoodna lagusoo qaadayo arrimaha siyaasadda dalka iyo hoggaankiisa ayaa ah mid ka baxsan    xayndaabka  massaajidyada loogu talogalay, kaasoo ah in masaajidka lagu cibaadaysto , wax dadka iyo dawladediisa kala kaxaynayana aana lagu soo qaadin .

Wasaaradda diinta iyo awqaafta oo aan iyadu Boorama ku lahayn xafiisyo iyo culimaa’udiin  ka jawaabi kara dacaayadaha diinta loogu soo gabbanayo  ayaan haba yaraatee ka muuqan gobolka Awdal, sidaa darteedna aan la yaabaa marka masuuliyiinteeda sarsare kasoo baxaan shaashadaha   ama warabaahinta kale , waxana isweydiiyaa ilaa intee ayey wasaaraddaasi  xukuumadda ka difaaci kartaa ololaha dhinaca diinta loo adeegsanayo ee lagu durayo .

Guud ahaan marka la eegana jawiga ay ku socdaan ololaha dhinaca diinta ee Boorama ka socda, hadday tahay wacdi iyo hadday tahay muxaadarooyinba iyo hadday khudbado jimce tahayba, waxaad ogaanaysaa in jiraan arrimo dheeraad ah oo dadkan lagu jihaynayo, waxana loo baahnaa in xukuumaddu ka hawlgasho waa hore  sidii ay ula socon lahayd waxyaalaha ka iman kara ololahan diineed ee hadh iyo habeen ka socda magaalada, kaaso marmarka qaarkood  dhaafsiisan in dadka lagu wacyigeliyo shanta salaadood iyo  shanta rukni ee islaamka .

Wariye:-
Maxamed Cumar Sh.Ibraahim-(Hyena)
Lughayanews-Boorama